Опозициската СДСМ повторно ја води најжестоката битка – со самата себе. Платформата „12.05 Разговори за иднината“ јавно побара Венко Филипче да се повлече од лидерската функција, а Филипче им одговори со етикета: „ЗНАМ 2.0“.

Зад платформата стојат луѓе со долги партиски биографии: Игор Ивановски, Андреј Петров, Емилијан Станковиќ, Гордан Георгиев, Ќуркчиев и актуелната пратеничка Славјанка Петровска. Нивната порака е дека СДСМ со рејтингот е на „егзистенцијален минимум“ и дека, ако не си оди актуелниот лидер, партијата ќе исчезне. Уверуваат дека нема да формираат нова партија, нема да излегуваат со независни листи и дека зад нив не стои бизнисмен што ги финансира. Најавија нов собир во сабота.

Ивановски отиде и подалеку. Тврди дека постои „тотално осмислена и договорена политика“ меѓу власта и опозицијата, во која Христијан Мицкоски „купува време“, а Филипче „купува слобода“. Тоа е тешко обвинување, изречено без доказ на маса – исто како и одговорот од другата страна.

Филипче вели дека со тие луѓе се видел поединечно и дека платформата е нов ЗНАМ. „Тоа се луѓе коишто беа на многу високи партиски функции, коишто молчеа кога се формираше првиот ЗНАМ. Па сега сакаат со пуч да ја преземат партијата“, изјави тој. Се повикува на четиригодишен мандат добиен од над 10.000 членови и прашува зошто платформата излегува токму кога СДСМ објавува обвинувања за лобирање во корист на премиерот и за пет нови рудници. Партијата ја нарече иницијативата дефокус, но во реакцијата не понуди докази дека платформата е поврзана со власта.

Меѓу двата табора се понуди и посредник. Поранешниот функционер Есад Рахиќ смета дека ниту едните ниту другите немаат решение и дека се „заглавени во пат-позиција“. Неговата прогноза е мрачна: ако продолжи вака, на СДСМ ќе му се случи судбината на грчкиот ПАСОК. За двете страни вели дека се „како гуски во магла“.

Тука е суштината. Една страна го обвинува лидерот дека тајно соработува со власта, другата ја обвинува платформата дека тајно работи за власта. А власта? Таа може само да гледа како опозицијата сама си ја троши енергијата. Кој навистина профитира од оваа војна – и дали членството на СДСМ воопшто ќе биде прашано?