Управниот одбор на Заедницата на единиците на локалната самоуправа (ЗЕЛС) одржа редовна седница на која, според соопштението, беа разгледани повеќе актуелни прашања од значење за функционирањето на општините и унапредувањето на локалната самоуправа.

Најконкретната точка беше барањето на Стопанската комора за измени на Законот за комуналните такси. На седницата, стои во соопштението, „беа разменети мислења за прашањата кои се од значење за општините и локалната економија“. Какви измени бара Комората, што мислат општините и дали ЗЕЛС ги поддржува, ниту збор.

Одборот го разгледа и текстот на Меморандумот за соработка со Министерството за социјална политика, демографија и млади и Националниот младински совет, како и подготовките за Генералното собрание на ЗЕЛС, закажано за средината на декември.

Комуналните такси се пари што ги плаќаат граѓаните и фирмите, а ги собираат општините. Кога бизнисот бара измени, а општините „разменуваат мислења“, јавноста има право да знае на чија страна ќе застане ЗЕЛС. Или тоа ќе го дознаеме дури кога законот ќе стигне во Собранието?