Мицкоски најавува уште шест месеци кризна состојба за нафта: Кога вонредното станува редовно?

Кризната состојба за нафта и нафтени деривати ќе трае уште шест месеци. Премиерот Христијан Мицкоски го најави тоа одговарајќи на новинарско прашање: „Дај Боже да дојде до деескалација и смирување на состојбата, за да можеме да ја прекинеме кризната состојба. Но кризната состојба ќе ја продолжиме за уште шест месеци, мислам до април.“

Сегашната кризна состојба истекува на 20 октомври. Воведена е по случувањата на Блискиот Исток, кои го блокираа снабдувањето со нафта и деривати на меѓународните пазари, а Собранието веќе двапати ја продолжи – прво до 21 јули, а потоа до 20 октомври. Во јули одлуката помина со 88 гласа „за“, без ниту еден против или воздржан. Новото продолжување засега е само најава. Зелено светло повторно треба да даде Собранието.

Кризната состојба ѝ дава на Владата правен механизам за побрзо и координирано управување со снабдувањето и со мерките за цените. Паралелно, мерката со која ДДВ за дизелот е намален од 18 на 10 отсто е продолжена за уште осум дена, до 20 октомври, а претходно беа намалени и акцизите за бензините и дизелот. Мицкоски остава можност кризната состојба да биде прекината и порано, доколку пазарите се смират.

Ако се продолжи до април, ова ќе биде трето продолжување по ред. Во тој момент веќе е тешко да се зборува за вонредна мерка – кризата станува начин на кој се управува. Никој не спори дека на граѓаните и на стопанството им требаат мерки за горивата. Но кога вонредното се продолжува по автоматизам, а цените на пумпите во изминатите месеци повеќепати се менуваа, некој треба јасно да каже по кои критериуми една криза почнува и по кои завршува.

Во јули Собранието го изгласа продолжувањето без ниту еден глас против. Дали и овојпат ќе ја прашаат Владата што точно направила со овластувањата од претходните продолжувања – или повторно ќе притиснат „за“ и ќе продолжат понатаму?