Комората бара помалку празници, а многу работници не добиваат ни додаток кога работат на празник

Стопанската комора излезе со иницијатива за кратење на празниците: празник што паѓа во недела да не значи слободен понеделник, а вработените да избираат само два верски празници. Додека Комората брои неработни денови, синдикатот потсетува на нешто што во таа сметка не влегува – колку работници воопшто не добиваат пари кога работат на празник.

„Голем број на работници не добиваат надоместок за работа на празник, во недела и неработен ден (некои добиваат 100 или 500 денари), добиваат годишен одмор под 20 дена и тоа по 5 или 8 денови во кој им го засметуваат и викендот, празниците и неработните денови, не добиваат додаток за минат труд, додаток за прекувремена работа, работа ноќе и не им ги исплаќаат другите додатоци“, вели претседателот на Сојузот на синдикатите на Македонија, Слободан Трендафилов.

Министерот за економија и труд Бесар Дурмиши засега е на страната на работниците. „Работниците имаат стекнати права, кои им припаѓаат ним. Празниците се за граѓаните што припаѓаат на која било религија и ние нема да интервенираме во тој дел“, изјави тој на прес-конференцијата на која ја претстави потрошувачката кошничка за август. Според него, фокусот треба да биде на зголемување на продуктивноста, „а не да ги демотивираме работниците со овие чекори“.

Дурмиши вели дека официјален предлог од Комората сè уште не стигнал до Министерството. Ако стигне, ќе се разгледува на седницата на Економско-социјалниот совет закажана за 19 октомври. Со други зборови, вратата е затворена на прес-конференција, но останува отворена на седница.

Иницијативата на Комората се сведува на повеќе работни денови. Но ако дел од работодавците ниту сега не плаќаат за работата на празник, ниту даваат законски годишен одмор, тогаш проблемот со продуктивноста можеби не е во календарот. Пред да се бришат празници, некој треба да провери кој ги почитува правата што веќе постојат. Тоа е работа за Државниот инспекторат за труд, а не за оние што ги бројат празниците.