ПРЕД 153 ГОДИНИ СО ВОЗ ОД СКОПЈЕ ДО СОЛУН, ПРЕД 138 ГОДИНИ ДО БЕЛГРАД – А ВО 2026 ГОДИНА НЕМАМЕ НИТУ ЕДЕН РЕДОВЕН МЕЃУНАРОДЕН ПАТНИЧКИ ВОЗ!

Моментално, на 11 октомври 2026 година, од Скопје нема потврдени редовни меѓународни патнички возови до Солун, Белград или Приштина, а пругата кон Бугарија не е ниту направена.

Во 1873 година, во времето на Османлиската Империја, Скопје добило железничка врска со Солун. Само една година подоцна било воспоставено железничко поврзување со Косово, а во 1888 година Македонија преку Белград била поврзана со европската железничка мрежа.
Денес, во 2026 година, повеќе од еден и пол век подоцна, граѓаните немаат редовна меѓународна патничка железничка врска со ниту една од овие три дестинации.
Пред 150 години се граделе пруги за да се поврземе со Европа. Денес имаме пруги, но немаме возови за да стигнеме до соседите.

Прашањето за железницата е прашање на  државни приоритети, инфраструктурна политика и одговорност за децениското назадување на патничкиот железнички сообраќај.

Интересен е податокот: Македонија има железничка инфраструктура кон сите три дестинации, но нема редовен меѓународен патнички превоз по овие линии.

Воспоставувањето градска железничка линија меѓу Зелениково и Ѓорче Петров може да биде корисен проект за граѓаните на Скопје. Но, градскиот железнички превоз не смее да се развива на сметка на меѓународниот железнички сообраќај.