Градоначалникот на Битола Коњановски: „Се чувствувам немоќен“ пред коњите и козите на улиците, а акциите на инспекторите некој ги издавал

Битолскиот градоначалник Тони Коњановски на седница на Советот рече нешто што ретко се слуша од градоначалник: „Некако бавно ни одат работите, без никого да обвинувам. Несфатливо е, јас се чувствувам немоќен.“ Темата не е буџет ниту автопат, туку коњите и козите што шетаат низ битолските улици. Човек со коњ во презимето, немоќен пред коњите. Иронијата не ја смисливме ние.

Поважниот дел од изјавата дојде потоа. „Неколку пати беа дојдени комунални инспектори, имаа неколку неуспешни акции оти некој ги пробил акциите, кажувал, па не можеа да се најдат козите, кои ќе стигнат до Широк Сокак, за жал“, рече Коњановски. Преведено: некој однапред кажувал кога доаѓа инспекцијата. Тоа веќе не е комунален проблем. Тоа е тврдење на градоначалник дека нешто протекува од институциите, а кој протекува, не рече.

На хартија сè е решено. Одлуката за комунален ред на Општина Битола, во член 103, забранува чување ситна и крупна стока, живина и пчелни семејства во границите на градежниот опфат, како и задржување и напасување на јавни површини. Животното затекнато без сопственик, по налог на инспектор, се сместува до 15 дена во посебен простор во Зоолошката градина, а сопственикот ги плаќа трошоците и штетата.

Коњановски вели дека има трла на 200 метри од поранешен ресторан, а на битолчани, кои многупати реагирале, сопственикот на козите им е познат. Општината, пак, одговара дека инспекторатот врши редовен надзор, но дека има ситуации кога сопствениците не се затекнати на терен. Козите ги наоѓаат минувачите, а инспекторите не. Тоа не зборува добро за надзорот.

Градоначалникот за крај повика на заеднички притисок: и граѓанскиот сектор, и советниците, и локалната самоуправа. Секако, „да притиснеме“ звучи добро на седница. Но кого точно да притиснат граѓаните, кога тој што го бара притисокот е човекот што ја води општината?