Инвеститори од Емиратите во Гази Баба: Потпишан меморандум, во фокусот зоната „Северна обиколница“, а сума и конкретен проект во соопштението не се споменуваат

Општина Гази Баба ја посети делегација од Обединетите Арапски Емирати: Хамад Ал Памси, претседател на „Emirates Investment Group“, извршниот директор Елиас Згеиб и Антон Ел Зогби, потпретседател на „Al Bata Group“. На средбата присуствуваше и македонскиот амбасадор во Емиратите, Абдулкадар Мемеди. Градоначалникот Бобан Стефковски ја нарече значајна.

Резултатот е Меморандум за соработка, со кој, како што вели Општината, се поставува основа за „понатамошно поврзување, развивање партнерства и конкретни активности“. Во фокусот на разговорите била индустриската зона „Северна обиколница“, со нејзиниот потенцијал за нови инвестиции и работни места.

Во соопштението не се споменуваат сума, проект ни рок. Самата општина вели дека дури во периодот што следи ќе работи на „конкретизирање на договорените активности“. Значи, договорено е дека ќе се конкретизира.

Меморандумите се лесни за потпишување, а Балканот ја знае таа фотографија напамет. Можеби оваа ќе биде исклучок и навистина ќе донесе фабрики во „Северна обиколница“. Кога ќе се појави сума, тогаш ќе имаме и вест.