Операта „Никола Шубиќ Зрињски“ во Риека на 4 ноември – точно 150 години од премиерата на Зајц, концертно во театарот што го носи неговото име

ХНК Иван пл. Зајц во Риека во среда, 4 ноември, во 19:30 часот ја поставува свечената концертна изведба на „Никола Шубиќ Зрињски“, најпознатата опера на Иван Зајц. Датумот е избран намерно: делото е праизведено на 4 ноември 1876 година во тогашниот Народен земски театар во Загреб, а на премиерата диригираше самиот Зајц. Во Риека ја води маестро Игор Влајниќ.

Зајц е роден во Риека и затоа театарот го носи неговото име. Операта го раскажува последниот отпор на банот Никола Шубиќ Зрињски, кој во 1566 година загина бранејќи го Сигет од османлиската војска на Сулејман Величествени. Херој, опсада, смрт наместо предавство: заплет што секој балкански народ го знае напамет, само со свои имиња.

Влајниќ ја има операта во репертоарот повеќе од 20 години. Во јуни ги водеше јубилејните изведби во ХНК во Загреб, сите распродадени, и за таа прилика ја позајми оригиналната палка од слонова коска на Зајц од збирката на Вила Ружиќ во Риека. Вечерта во Риека е и прослава на 30 години уметничка работа на оперските уметници Кристина и Роберт Колар, кои во риечката продукција од 2020 година ги пееја Ева и Зрињски.

Концертна изведба значи без сценографија: сè паѓа на оркестарот, хорот и гласовите. Билетите се од 19 до 29 евра, околу 1.170 до 1.790 денари, на mojekarte.hr.