Мостот „Генерал Михајло Апостолски“, прекрстен во „мост за ловење риба“, наскоро во функција, вели Ѓорѓиевски – датум нема

Градоначалникот на Скопје Орце Ѓорѓиевски објави дека мостот „Генерал Михајло Апостолски“, кој ги поврзува Аеродром и Гази Баба, „наскоро“ ќе биде пуштен во сообраќај. Пристапните улици веќе се асфалтираат, а трасата е ослободена откако бил решен процесот на експропријација, кој, според него, со години бил заглавен кај претходните раководства.

Мостот со години стоеше над Вардар без улиците што треба да водат до него, па граѓаните го прекрстија во „мост за ловење риба“. Градоначалникот самиот го употреби прекарот и вети дека мостот „конечно ќе ја добие својата вистинска намена“: полесно движење, пократки патувања и растоварување на сообраќајот.

„Зборот е збор“, напиша Ѓорѓиевски на Фејсбук, потсетувајќи дека ветил мостот да профункционира во текот на четиригодишниот мандат, а проектот го „одглавил“ за неполна година. Паралелно, вели, продолжува експропријацијата на преостанатиот дел од булеварот, сè до неговото целосно завршување.

Она што недостига во објавата е датумот. „Наскоро“ не е рок, а без рок нема ни кој да одговара ако работата повторно се одолговлечи. Останува и поголемото прашање, кое го надминува овој градоначалник: кој планира мост пред да го обезбеди земјиштето за патот до него?