Зеленски: Американците бараат Донбас за нешто „слично на НАТО“ – денес во Абу Даби првите преговори по осум месеци

Во Абу Даби денес почнува нов круг преговори меѓу САД, Русија и Украина – првите по повеќе од осум месеци пауза. А украинскиот претседател Володимир Зеленски го избра токму утрото пред средбата за да открие што Американците му нудат зад затворени врати: Донбас за Русија, во замена за безбедносни гаранции што не се НАТО, туку „нешто слично на НАТО“.

Зеленски на мрежата X објави дел од неодамнешно интервју за данска телевизија. Кога го прашале „Може ли да го замените Донбас за безбедност?“, вели дека веднаш вратил прашање: „Што точно значи тоа? Каква безбедност? НАТО?“. Одговорот бил – не НАТО, туку нешто слично. „Слично? Но за Донбас не барате сличен одговор. Барате јасен одговор. Тоа е вашата цел, а денес и целта на Путин“, порачал тој.

Аргументот на Зеленски е историски. „Путин зборуваше за Донбас, а потоа тргна кон Киев. Тврдеше дека ги брани луѓето што зборуваат руски, а потоа ги мачеше до смрт во Буча“, напиша тој. Потсети дека Украина своевремено се откажа од нуклеарното оружје, па сепак беше нападната. „Никој не верува дека Путин ќе застане ако му го оставиме Донбас. Ќе направи пауза и ќе се врати за една, две или пет години. И кој тогаш ќе биде виновен?“

Американците ги претставуваат специјалниот пратеник Стив Виткоф и зетот на Трамп, Џаред Кушнер. Украинската делегација ја води Рустем Умеров, а руската – помошникот на Путин, Владимир Медински. Неименувани американски функционери пред средбата тврдеа дека и Москва и Киев покажуваат знаци на попуштање околу размена на територии. Зеленски со една објава им покажа дека на нивната приказна не ѝ верува.

Балканот добро знае колку вредат гаранциите на хартија. Сребреница во 1995 година беше „заштитена зона“ на Обединетите нации. Затоа прашањето на Зеленски не е реторичко: ако „сличното на НАТО“ не функционира, кој ќе одговара – и пред кого?