Најдобрата тапа во Шпанија за 2026 е бао полнето со јагнешко: Џиале Пан победи меѓу 45 готвачи со залак што ги спојува Азија и Кастилја

Шпанците ги сфаќаат тапите толку сериозно што за нив имаат национален шампионат. Годинава, 22-риот Национален конкурс за пинчоси и тапи во Ваљадолид заврши со победа што кажува многу за тоа како се менува европската кујна: најдобрата тапа во Шпанија е бао, азиско лепче на пареа, полнето со кастилјанско јагнешко.

Во Куполата на милениумот во Ваљадолид се собраа 45 готвачи од цела Шпанија за да ги подготват своите тапи во живо. Жирито го водеше Жанаина Торес, прогласена за најдобра готвачка во светот за 2024 година според The World’s 50 Best Restaurants. Првата награда ја доби Џиале Пан, готвач со азиско потекло што живее во Ваљадолид и го води ресторанот Jiapan, едно од најпознатите места за јапонска кујна во градот, со нигири, гиоза, дим сум и бао на менито. Неколку недели претходно, со оваа тапа го освои и регионалниот конкурс на Кастилја и Леон.

Залак со семејна приказна. Тапата се вика „Doce/29“, по 29-тиот ден од дванаесеттиот месец во кинескиот лунарен календар, датум кога семејствата традиционално се собираат и се подготвуваат за Новата година. Идејата за средба е пренесена и во чинијата. Основата е бао, традиционалното азиско лепче што се готви на пареа. Пан го полни со редукција од месо од млечно јагне, состојка тесно врзана за кастилјанската кујна. Врз него оди песто од пињоли од Педрахас, општина во покраината Ваљадолид прочуена токму по пињолите, со праз и пепел од шитаке печурки.

Кај нас, каде што јагнешкото е задолжително за Ѓурѓовден и за секоја поголема трпеза, ова е добар потсетник дека традиционалната состојка не мора секогаш да се готви на ист начин. Пан не ја замени кастилјанската традиција со азиска. Ги стави една во друга, буквално. Кој наш готвач прв ќе се осмели печено јагнешко да стави во азиско лепче?

На подиумот застанаа уште двајца. Второто место го освои Тео Родригез од ресторанот Trasto во Ваљадолид со тапата „Bola del Mundo“, а третото Хуан Гарсија Домингез од ресторанот Dólar Coreses во Виторија-Гастеис со „Volcán del Norte“. Добрата вест за оние што ќе се најдат во Ваљадолид до недела, 15 ноември: тапите од конкурсот се служат во градските барови и ресторани по единствена цена од 3,50 евра, а адресите се во апликацијата SpainIsTapas.

Светската титула, пак, остана во Ваљадолид. Паралелно со националниот конкурс се одржа и Светскиот шампионат за тапи, кој веќе десет изданија собира готвачи од пет континенти. Шпанија има резервирано место за минатогодишниот национален победник, а тоа беше Алехандро Сан Хосе од Habanero Taquería во Ваљадолид. Тој се врати со нова верзија на победничката „Milpa“, наречена „Milpa Meseta“, и ја освои титулата најдобра тапа на светот пред жирито на Марио Сандовал, готвачот на ресторанот Coque со две Мишелин ѕвезди. Тоа е крцкав прстен од пченка околу сочно јагнешко варено во зелен сос од томатиљо, со чинтексле од бакалар, ананас во тепаче и карамелизирани пињоли – мексиканска кујна и кастилјански производи во еден залак. Второто место отиде во Тајланд, кај Алонсо Луна Сарате од Ojo Bangkok, а третото во Малезија, кај Кени Ган Веи Кијат од Hachi by Kenny’s.