Дојче банк (DB) ќе затвори околу 100 филијали во Германија до крајот на оваа година, вклучувајќи и дел од филијалите на Постбанк, која е дел од ДБ Групацијата. Оваа одлука е дел од пошироката стратегија на банката за префрлање кон дигитални услуги и постепено намалување на физичката мрежа, изјави членот на управниот одбор задолжен за приватни клиенти, Клаудио де Санктис.

Според него, сè поголем број клиенти ги користат банкарските услуги преку мобилни апликации, додека интересот за посета на филијалите континуирано опаѓа. На крајот од 2025 година, Дојче банк и Постбанк заедно располагале со нешто повеќе од 750 филијали низ Германија и опслужувале околу 19 милиони приватни клиенти, објавува „Билд“.

Паралелно со затворањето на филијалите, Дојче банк развива и асистент базиран на вештачка интелигенција, кој во втората половина од 2026 година треба да им помага на клиентите при користење на апликацијата и да одговара на основни прашања. Банката наведува дека користењето на мобилната апликација е зголемено за околу 20 проценти во последните 18 месеци.

И покрај овие промени, Дојче банк не планира целосно да ги укине физичките филијали. Во иднина тие ќе служат претежно за советување на клиентите при „важни животни одлуки“, како што се купување недвижен имот, инвестиции или земање кредити, и тоа во живо или преку видеоконсултации.

Затворањето на филијалите ќе доведе и до намалување на бројот на вработени во малопродажниот сектор, но од банката уверуваат дека нема да има масовни отпуштања. Намалувањето ќе се одвива преку пензионирања и заминувања без пополнување на слободните работни места.

Промените ќе значат и помал број банкомати, што особено ги погодува постарите клиенти. Како алтернатива, Постбанк најави можност за подигнување готовина во одредени продавници, но со задолжително користење мобилна апликација и дигитален код.