Градоначалникот на Општина Центар Горан Герасимовски ги инспектираше тековните работи на реконструкцијата на улицата „Светозар Марковиќ” во населбата Ново Маало. Проектот зафаќа 1.310 квадратни метри и 210 метри должина на улица, каде тековно се полага нов асфалт.

Во рамките на проектот предвидени се: ширење на коловозот, нови рабници и тротоари, ново улично осветлување, како и поставување на нова атмосферска и фекална канализација. Реконструкцијата целосно ја обновува инфраструктурата на оваа улица, обезбедувајќи подобри услови за сообраќај и пешаци.

„Во Центар се реализираат конкретни проекти со стандарди кои ги заслужуваат граѓаните. Секоја уредена улица е чекор кон поразвиена и побезбедна општина”, изјави градоначалникот Герасимовски при инспекцијата на теренот.

Ова е дел од поширока програма за реконструкција на општини Центар. Паралелно тековно се вршат работи на улицата „Мирослав Крлежа” во Дебар Мало, а во план е и реконструкција на вториот правец на улицата Ленин.