Третата група македонски државјани евакуирани од Блискиот Исток пристигна синоќа на Приштинскиот меѓународен аеродром. Евакуирани беа граѓани кои престојувале во Катар, Кувајт, Саудиска Арабија и Бахреин, претходно собрани во Ријад со организиран транспорт, а оттаму со специјален лет го напуштиле регионот.

Надворешниот министер Тимчо Муцунски соопшти дека авионот носел 151 патник, од кои 109 се македонски државјани, а останатите се државјани на неколку други земји. „Евакуацијата беше реализирана врз основа на претходно воспоставен план и во координација со надлежните институции. Министерството останува на располагање на сите наши граѓани кои имаат потреба од поддршка во засегнатите региони”, изјави Муцунски.

Два дена порано, специјален лет од Дубаи донел 150 патници, меѓу кои 125 македонски државјани. Пред тоа, со лет на Flydubai биле евакуирани 151 патник, претежно македонски државјани, од Обединетите Арапски Емирати. Во самиот почеток на конфликтот, шест македонски државјани биле извлечени од Израел со владиниот авион.