Саудиска Арабија го задржува правото на воена акција против Иран откако балистички ракети го погодија Ријад, изјави саудискиот министер за надворешни работи принцот Фајсал бин Фархан.

„Овој ирански притисок ќе им се врати политички и морално, а ние природно ја задржуваме опцијата за воени мерки доколку околностите тоа го бараат”, изјави принцот на прес-конференција по средбите со дипломати од регионот.

Околу дванаесет министри за надворешни работи – вклучувајќи ги Турција, ОАЕ, Јордан, Катар и Сирија – се собраа на консултации во Ријад. Во близина на хотелот каде се одржуваше конференцијата, беа забележани против-ракетни одбрани во акција.

Од почетокот на конфликтот, Саудиска Арабија се соочи со стотици ирански ракетни и дронски напади, а властите тврдат дека огромното мнозинство беа пресретнати. Одбранбеното министерство соопшти дека пресретна четири балистички проектили насочени кон Ријад.

Бин Фархан нагласи дека Саудиска Арабија сеуште претпочита дипломатски канали, но предупреди: „Доколку Иран не престане веднаш, верувам дека практично ништо не може да ја врати довербата.”