Администрацијата на Доналд Трамп му доставила на Иран план од 15 точки за ставање крај на конфликтот, при што бара едномесечно примирје за да се разговара за предлогот, пренесуваат светските медиуми повикувајќи се на израелскиот “Канал 12”.

Првите пет точки од планот се однесуваат на нуклеарниот сектор. Вашингтон бара Иран никогаш да не се обидува да се здобие со нуклеарно оружје, да го предаде целото збогатено нуклеарно гориво на утврден датум, како и да бидат демонтирани неколку клучни нуклеарни објекти.

Иран ќе треба да се откаже од поддршката за групи како Хезболах и Хамас, да престане да ги финансира и вооружува. Предвидени се и ограничувања за бројот на ракети со кои земјата може да располага и за нивниот дострел.

Дополнително, Хормушкиот Теснец низ кој минуваат околу 20 проценти од светските испораки на фосилни горива, ќе мора да остане отворен за пловидба.

Барањата биле доставени преку посредство на Пакистан, кој одржува добри односи со двете страни. Портпаролот на иранските вооружени сили за планот вели дека Американците всушност преговараат сами со себе, додавајќи: “Некој како нас никогаш нема да се смири со некој како вас”.

Коментарите доаѓаат откако Трамп рече дека Иран “толку очајно” сака договор и дека им дал на САД “многу голем подарок вреден огромна сума пари”.