Украински дронови паднаа на територијата на Финска, што предизвика остра реакција од премиерот Петери Орпо, кој инцидентот го опиша како „повреда на територијалниот интегритет и исклучително сериозна работа”.

Истрагата за потеклото на дроновите е во тек, но властите веруваат дека станува збор за украински дронови кои скршнале од курсот. Министерот за одбрана Анти Хаканен потврди дека беспилотните летала навлегле во финскиот воздушен простор.

Два беспилотни летала беа детектирани над југоисточна Финска во неделно утро. Едното паднало северно од градот Коувола, а другото источно. Финското воено воздухопловство итно подигна ловци Ф/А-18 Хорнет за идентификација на објектите.

Ова е последниот во серијата инциденти кои ги засегаат балтичките членки на НАТО. Естонија, Латвија и Литванија пријавија слични навлегувања на дронови претходно оваа недела. Украина во последниот период ги интензивираше ударите со дронови врз руски рафинерии и енергетска инфраструктура, додека мировните преговори стагнираат.