Јавниот обвинител Ненад Савески донесе одлука за повлекување на овластувањата на обвинители кои работеле на предмети надвор од нивните матични канцеларии, со што обвинителката Ленче Ристоска останува без двата предмета „Талир” за наводно незаконско финансирање на ВМРО-ДПМНЕ.

Савески изјави дека одлуката не е персонално насочена кон Ристоска и не е политички мотивирана, туку е насочена кон воспоставување ред и документација во обвинителскиот систем. „Ова не се политички мотивирани одлуки”, нагласи Савески.

Едниот предмет „Талир” спаѓа под Јавното обвинителство за организиран криминал, каде Ристоска не работи, и автоматски е отстранет. Вториот предмет, формално доделен на нејзината канцеларија, бара проверка дали овластувањето било правилно доделено.

Исклучоци се направени за канцелариите во Ресен и Крива Паланка поради недостиг на кадар, како и за комплексниот случај во Кочани кој вклучува 15 обвинители. Савески посочи дека конечна одлука за целосно отстранување на Ристоска од предметите „Талир” сеуште не е донесена.