Европскиот комесар за енергетика Дан Јергенсен предупреди дека Европа мора да се подготви за долготрајна криза со снабдувањето со нафта и гас, при што цените на енергентите ќе останат високи уште многу долго.

„Ова ќе биде долга криза, а цените на енергијата ќе останат многу високи уште многу долго”, изјави Јергенсен за Financial Times, нагласувајќи дека состојбата со одредени „критични производи” ќе се влоши во наредните недели.

Комесарот потенцираше дека иако кризата сè уште не се манифестира целосно на практично ниво, јазикот со кој сега зборува Брисел е без преседан во споредба со претходните енергетски нарушувања. „Дури и ако конфликтот завршеше веднаш, последиците ќе траат долго поради оштетената инфраструктура”, рече тој.

На состанокот на министрите за енергетика на ЕУ, Јергенсен соопшти дека само 30 дена конфликт ја чинале Унијата 14 милијарди евра за увоз на нафта и гас. Откако конфликтот започна, европските цени на гасот пораснале за околу 70 отсто, а цената на нафтата за 60 отсто.

Брисел ги координира земјите членки за рано полнење на складиштата за гас пред следната зима, а Комисијата разгледува мерки вклучувајќи ослободување на дополнителни стратешки резерви на нафта. Рационирање на критични производи, како авионско гориво и дизел, засега не е воведено, но останува на маса како последна опција.