По 13 години без здравствено осигурување, вработените во Јавното комунално претпријатие „Комуналец” во Гостивар конечно добиваат пристап до здравствена заштита.

Министерот за локална самоуправа Ристо Пенов и градоначалникот на Гостивар, Арбен Алиу, ја најавија оваа промена како исправање на долгогодишна системска неправда.

„Исправивме неправда која траеше повеќе од една деценија. Стотина вработени во претпријатието конечно ќе имаат основно право – здравствено осигурување”, изјави Алиу.

Проблемот датира од 2013 година, кога поради финансиски потешкотии на претпријатието, придонесите за здравствено осигурување престанале да се уплатуваат, оставајќи ги работниците без пристап до основна здравствена заштита.