Македонија и Соединетите Американски Држави го продлабочуваат стратешкото партнерство преку нови форми на соработка во енергетиката, дигиталната трансформација и безбедноста, договорено на Стратешкиот дијалог одржан во Вашингтон.

Милионски пакет од САД е наменет за одбраната, енергетиката и сајбер-безбедноста. Покрај веќе најавените 5 милиони долари за сајбер-безбедност и 3,5 милиони за МВР, стратешкиот дијалог опфати и соработка во набавка на течен природен гас од САД.

Делегацијата ја предводеше министерот за надворешни работи Тимчо Муцунски, со учество на министрите за внатрешни работи Панче Тошковски, за одбрана Владо Мисајловски, за дигитална трансформација Стефан Андоновски и за енергетика Сања Божиновска.

Двете страни ја потврдија намерата за зајакнување на соработката во борбата против тероризмот, организираниот криминал, илегалната миграција и трговијата со дрога. Посебен фокус е ставен на изградбата на центар за сајбер-инциденти со американска техничка помош.

Енергетската компонента вклучува и диверзификација на изворите на енергија, со цел намалување на зависноста од еден добавувач и зајакнување на енергетската безбедност на земјата.