Европската комисија соопшти дека над 27.000 лица им бил одбиен влезот во Европската унија откако стапи на сила новиот систем за влез и излез (EES), кој ги заменува традиционалните печати во пасошите со дигитална биометриска контрола.

Системот, кој стана целосно оперативен на сите надворешни граници на Шенген-зоната, автоматски ги евидентира влезовите и излезите на граѓаните од трети земји. Наместо рачно печатирање, граничните служби сега користат електронска верификација со биометриски податоци.

Европската комисија идентификуваше три главни причини за одбивање на влезот: пречекорување на дозволениот престој од 90 дена во период од 180 дена, недостаток или нецелосност на биометриските податоци потребни за верификација, и безбедносни причини поврзани со лица означени како ризик во било која земја-членка.

Имплементацијата на EES веќе предизвика значителни гужви на граничните премини, особено на влезовите кон Хрватска од Србија и Босна и Херцеговина, каде патниците чекаа со часови. Проблеми се забележани и на европските аеродроми, каде авиокомпаниите предупредија на потребата од дополнително време за обработка на патниците.

Комисијата го поздрави целосното спроведување на системот, нагласувајќи дека секој влез е транспарентен и законски утврден, а системот овозможува моментално откривање на лица кои го пречекориле дозволениот престој. Граѓаните кои патуваат кон ЕУ се советуваат да предвидат дополнително време на граничните премини и да се осигураат дека нивните документи се целосни и ажурирани.