Петер Маѓар го победи Орбан, објави нова ера за Унгарија – а потоа веднаш побара средба со Путин. Не за Украина, не за мир, туку за енергенти. Географијата, вели, не се менува.

Новиот унгарски лидер уште не стапил на премиерската функција, а веќе отворено призна дека Будимпешта останува енергетски зависна од Москва. „Ќе мора да седнеме на преговарачка маса со рускиот претседател. Географската положба ниту на Русија, ниту на Унгарија нема да се промени. Нашата енергетска зависност од Русија исто така останува”, изјави Маѓар.

И тука доаѓа најинтересниот дел – Маѓар јасно нагласи дека во тие разговори ќе ги застапува исклучиво унгарските интереси, не украинските. Значи, ветувањата за „враќање во ЕУ и НАТО” важат – но само до моментот кога треба да се плати сметката за гас и нафта.

Орбан заминува, политиката останува

Виктор Орбан со години блокираше санкции против Русија и инсистираше Украина да дозволи транзит на руска нафта преку нафтоводот „Дружба”. Новата власт можеби зборува поинаков јазик, но суштината е иста – Унгарија физички не може да се откаже од руските енергенти преку ноќ. Дали Брисел тоа го пресметал кога слави „пад на Орбан”?

Партијата ТИСА на Маѓар освои уставно мнозинство – 138 од 199 пратенички места. Доволно за менување закони, менување устав, менување сè. Но дали е доволно за менување на енергетската карта на Централна Европа? Тоа е сосема друго прашање.