Десет научници и функционери со пристап до најчувствителни нуклеарни и вселенски податоци – исчезнати или мртви од 2023 година. Америка, земјата со најсофистицираниот безбедносен апарат на планетата, не може да објасни што се случува со нејзините најпаметни луѓе.

Претседателот Трамп ја оцени ситуацијата како „многу сериозна” и најави детално испитување во наредните недели. Портпаролката на Белата куќа призна дека сè уште не консултирала разузнавачки служби за можни поврзаности меѓу случаите. Дали ова е нормален темп на реакција кога ви исчезнуваат луѓе кои знаат како да направат нуклеарно оружје?

Посебно внимание привлече исчезнувањето на пензионираниот генерал-мајор Вилијам Нил Мекозланд, кој исчезнал од својот дом во Ново Мексико под мистериозни околности – оставил лични предмети, а зел само оружје. Сличен образец се повторува и кај други случаи: научници и вработени во клучни институции, вклучувајќи ја Националната лабораторија Лос Аламос и НАСА, исчезнуваат без објаснување, оставајќи ги зад себе личните работи без никаква трага.

Во некои случаи станува збор за убиства. Астрофизичарот Карл Грилмајер и нуклеарниот физичар Нуно Лоурејро биле убиени во своите домови. Убиства на научници кои работат на најчувствителни државни проекти – а властите сè уште бараат „можни поврзаности”.

Експертите предупредуваат дека зад овие настани може да стои модерна шпионажа, со оглед на тоа дека сите жртви се поврзани со стратешки значајни проекти. Во ерата кога информациите се најмоќното оружје, научниците очигледно станаа мети – а прашањето е чии.

Официјални потврди за поврзаност меѓу случаите нема, но серијата на слични инциденти е премногу конзистентна за да биде случајност. Кога ви исчезнуваат луѓе од Лос Аламос, тоа не е локална крими-хроника – тоа е прашање на глобална безбедност.