Иран го затвори Ормуз, го блокира поминувањето, а потоа – почна да наплаќа. Но не за сите. Русија, како „пријателска земја”, добива исклучок. Значи, контролата на мореузот не е прашање на безбедност – туку на геополитичка лојалност.

Ирскиот амбасадор во Москва, Казем Џалали, потврди дека Техеран предвидел исклучоци за одредени земји, вклучувајќи ја и Русија, кога станува збор за таксите за поминување низ Ормускиот мореуз. „Во овој момент предвидовме исклучоци за некои земји. Нашето Министерство за надворешни работи настојува да ги активира исклучоците предвидени за пријателски земји, на пример за Русија”, изјави Џалали.

Техеран ги најави плановите за наплата по нападите од САД и Израел, образложувајќи го потегот со трошоците за обезбедување на безбедноста во мореузот. Мореузот е моментално затворен со одлука на Иран и ќе остане блокиран до целосно укинување на американската поморска блокада.

Првиот приход од такси веќе е во банка

Заменикот на претседателот на иранскиот парламент, Хамидреза Хаџи Бабаи, изјави дека Иран за прв пат остварил приход од такси за поминување низ Ормуз, а средствата се уплатени во Централната банка на Иран. Кон крајот на март почна изработка на нацрт-закон за мореузот, кој предвидува наплата во ријали и забрана на транзит за САД, Израел и земјите што поддржуваат санкции против Техеран.

Преговорите меѓу САД и Иран не дадоа резултат. На 8 април двете страни соопштија за двонеделно примирје, но Иран потоа ги одби новите разговори, оценувајќи ги контактите со Вашингтон како „губење време”. Дали дипломатијата воопшто има шанса кога едната страна минира, а другата наплаќа?