Левица алармира: концесискиот систем за ископ на мермер во Македонија е „систематски дизајниран модел кој ја оштетува државата и граѓаните”. Бројките зборуваат сами – 1,7 милиони евра собрани за четири години од 29 концесионери. Тоа е помалку отколку што чини еден луксузен стан во Скопје.

Партијата тврди дека „профитите се приватизирани, а еколошките, економските и социјалните трошоци паѓаат на државата и граѓаните”. Концесиските стапки се прениски, надзорот е слаб, концесиите се прошируваат без контрола, а за рекултивација на земјата по ископот се одвојуваат минимални средства.

Екологистите дополнително алармираат за предложените закони за минерални суровини и за концесии. „Природата не е на распродажба”, порачуваат. Левица предлага формирање државни претпријатија за управување со природните ресурси наместо концесии.

Македонија е мала земја со ограничени ресурси. Да ги даваш за ситни пари и да ги оставаш дупките зад себе – тоа не е економија, тоа е распродажба. А кога рудникот ќе се исцрпи, остануваат само кратерите и прашањето кој зел колку.