Белгиската влада разгледува можност да изгради или изнајми затвор во странство — најверојатно во Косово или Албанија — со цел да го намали притисокот врз домашниот затворски систем кој е сериозно пренатрупан. Како што објави „Бриселс тајмс“, министерката за правда Анелизе Верлинден и министерката за миграција Анелине ван Босеит се на тридневна мисија на Балканот за да ја проценат подготвеноста на овие земји да прифатат белгиски затвореници и да ја зајакнат соработката во борбата против организираниот криминал.

За време на посетата, планирано е потпишување декларација за намера за заедничко користење на конфискуван имот од криминални активности, вклучувајќи и средства запленети во рамки на истрагите за шифрираната мрежа „SKY ECC“.

Во белгиските затвори моментално има над 13.000 лица, а капацитетот е околу 11.000. Приближно една третина од затворениците се странци без регулиран престој. Владата верува дека префрлањето дел од нив во странство би го олеснило системот.

Планот е инспириран од данскиот модел, според кој Данска од 2021 година изнајмува затворски капацитети во Косово. Сепак, белгиските власти предупредуваат дека сличен проект би барал повеќе години подготовка и значителни средства. Според студија на белгискиот комесар за бегалци, Косово и Албанија се меѓу ретките земји надвор од ЕУ што ги исполнуваат условите за ваков тип соработка.

Иако ваквата мерка би можела да опфати само околу два проценти од вкупната затворска популација, властите сметаат дека тоа би бил чекор кон растоварување на системот. Мисијата засега има истражувачки карактер и не е донесена конечна одлука.