Deponia „Krasta“, ku përfundojnë mbeturinat e Kumanovës, sërish digjet - dhe sërish u mbajt një takim. Kryetari i Kumanovës, Maksim Dimitrievski, së bashku me kryetaren dhe një pjesë të anëtarëve të Këshillit, deputetë dhe drejtorin e NP „Çistota i zelenilo“, dje u takua me banorë nga Pçinja, Vinca dhe Studena Bara. Rezultati: premtim për makineri shtesë dhe dhe me të cilin do të mbulohet lokacioni.

„Komuna e Kumanovës do të angazhojë forca shtesë me makineri teknike që të dalin në terren, dhe do të kërkojmë ndihmë nga kompanitë shoqërisht të përgjegjshme në qytet dhe sasi shtesë dheu“, deklaroi Dimitrievski. Problemi, pranoi ai, është disadekadësh, ndërsa këtë verë e përkeqësuan temperaturat e larta dhe „ndërhyrja e pamjaftueshme me makineri“ në vetë deponinë.

Gjashtë muaj në tym. Si duket kjo nga ana tjetër e gardhit e përshkroi kryetari i Bashkësisë Lokale Pçinja, Aleksandar Ilievski. Lugina është e mbështjellë me tym prej më shumë se gjashtë muajsh, në të gravitojnë shtatë fshatra me mbi 5.000 banorë, ndërsa tymi ndihet deri në 30 kilometra larg, deri në Katllanovë. „Ne merremi me bujqësi dhe çdo ditë jemi më shumë se 10 orë nëpër ara dhe e thithim tymin toksik“, thotë ai. Banorët pohojnë se gjithnjë e më shumë njerëz kanë sëmundje të mushkërive dhe paralajmërojnë se, nëse nuk ndryshon asgjë, do të detyrohen të shpërngulen.

I njëjti tym arrin edhe në fshatrat e Shkupit. Rade Spasovski nga Konjari i Poshtëm thotë se këtë vit kanë kaluar më shumë se 50 ditë në tym, se kanë mbledhur 500 nënshkrime dhe kanë dërguar shkresa zyrtare te Qeveria dhe Ministria e Mjedisit. Kanë marrë premtim se deponia do të sanohet, por jo edhe kur. Ministria doli një herë në terren dhe e urdhëroi ndërmarrjen publike ta sanojë deponinë brenda 40 ditëve. Zjarret vazhduan.

Nga NP „Çistota i zelenilo“ thonë se e shuajnë zjarrin sa munden, por se për zgjidhjen e përhershme dhe zhvendosjen e deponisë duhet të vendosin Komuna dhe shteti. Komuna, nga ana e saj, zgjidhjen e përhershme e sheh në një sistem rajonal për menaxhimin e mbeturinave: stacion transferimi dhe fabrikë për përpunimin e mbeturinave pranë Shën Nikollës, për Rajonin Lindor dhe Verilindor. Dokumentacioni i tenderit i është dorëzuar Zyrës së BE-së dhe pritet mendimi.

„Për momentin ne vetëm duhet të blejmë kohë“, tha Dimitrievski. Banorët këtë e thonë ndryshe. „Këtu nuk shohim zgjidhje me dy ditë makineri dhe dhe“, thotë Ilievski, i cili kërkon që problemi të zgjidhet në nivel më të lartë. Kur ndërmarrja publike pret Komunën, Komuna pret mendimin e BE-së, e Ministria jep afate që nuk respektohen - kush saktësisht e mban barrën përveç njerëzve që marrin frymë?

Koha e blerë ka çmim. E paguajnë shtatë fshatra dhe mushkëritë e tyre, ndërsa fabrika pranë Shën Nikollës është ende një dosje në tryezën e dikujt.