Kryetari i Shtipit, Ivan Jordanov, doli me raport për vitin 2026 dhe me mesazhin se qyteti „vazhdon me zhvillim të përshpejtuar“. „2026 është vit i punës së vazhduar, rezultateve konkrete dhe ndryshimeve të dukshme për Shtipin“, tha ai, e pastaj e hapi listën.

Atuti më i madh është salla e re sportive „Xhekson“ me kapacitet prej 1.300 vizitorësh, të cilën kryetari e quajti „tempull i vërtetë sportiv“. Pranë ndërtesës „Promaja“ është ndërtuar garazh me tri kate për 50 automjete, ndërsa vende të reja parkimi ka në lagjen Prebeg, në oborrin e sallës „Jordan Mijalkov“ dhe te „7 kullat“, afër Fakultetit Ekonomik. Shtipi, sipas Jordanovit, është komuna e parë në vend me softuer të automatizuar për evidentimin dhe arkëtimin e parkingjeve publike.

Në rrugë: janë rindërtuar „Pitu Guli“, „Xhemal Bijediq“ dhe „Kezhovica“, ndërsa „Boris Kidriç“ pas pesë dekadash është rinovuar plotësisht. Në Bello Bërdo dhe lagjen Levaci po ndërrohet infrastruktura rrugore më e vjetër se 60 vjet, dhe ka filluar edhe ndërtimi i një rruge të re mes rrugëve „Todor Kolarov“ dhe „Mirçe Acev“, e cila duhet ta lehtësojë qasjen në SHMK „Jane Sandanski“ dhe në Spitalin e ri Klinik. Në pjesën sociale - mbështetje financiare për familjet e fëmijëve me aftësi të kufizuara, bursa për nxënës dhe sportistë dhe uniforma falas për nxënësit deri në klasën e pestë.

Çfarë është gati, e çfarë është „në vijim“? Një pjesë e listës janë ende projekte në punë: unaza, rezervuarët e rinj të ujit, urat mbi Bregallnicë dhe mega-parku prej rreth 70.000 metrash katrorë pranë lumit, për të cilin kryetari thotë se „po punojnë për krijimin“. Në raport nuk janë dhënë shuma - sa kushtoi salla, sa garazhi, sa do të kushtojë parku.

Shtipasit këtë do ta masin në mënyrën më të thjeshtë: a do të gjejnë parking, a do të rrjedhë uji dhe a do të bëhet mega-parku park, e jo edhe një zë në raportin e ardhshëm.