Ura e Gurit, simboli i Shkupit që e lidh sheshin „Maqedonia“ me Çarshinë e Vjetër të Shkupit, sërish ndriçon. Ura mori ndriçim të ri dekorativ dhe arkitektonik që i thekson harqet prej guri - pas vitesh në të cilat natën zhytej në errësirë.

Pse në errësirë? Sepse ndriçimi për vite me radhë ishte në gjendje të keqe. Nga disa llamba kishin mbetur vetëm kabllot, sepse vetë llambat ishin vjedhur, ndërsa pothuajse të gjitha dritat përgjatë shtegut në pjesën e brendshme të urës ishin ose të shkatërruara ose të marra. Ky është rigjallërimi i parë i ndriçimit të urës në dekadat e fundit.

Dritën e solli Esenleri. Projektin nuk e realizoi Qyteti, por komuna turke Esenler, me të cilën Qyteti i Shkupit në mars të këtij viti nënshkroi Protokoll për Miqësi dhe Bashkëpunim të Përbashkët. Qyteti ia besoi obligimin për vendosjen e ndriçimit, ndërsa komuna Esenler, si donatore, e zgjodhi realizuesin përmes sistemit turk të prokurimit publik. Kur u paralajmërua projekti, kryetari Orce Gjorgjievski njoftoi se shpenzimin do ta mbulojë Oda Maqedonase-Turke MATTO. Nga Qyteti tani sqarojnë se oda ishte logjistikë dhe lehtësuese e marrëveshjes, ndërsa donator është Esenleri.

Kryetari i Esenlerit, Mehmet Tevfik Göksu, i publikoi punimet në rrjetet sociale. „Po i përfundojmë punimet për ndriçimin e Urës historike të Gurit në Shkup, e cila ndodhet mbi lumin Vardar, u përfundua në kohën e sulltanit Mehmeti II Pushtuesi dhe për vite ishte në errësirë. Trashëgimia jonë historike tani do ta ndriçojë Shkupin edhe me dritën e saj“, shkroi ai.

Ura është e bukur edhe natën. Por dy pyetje mbeten të hapura. Sa kushtoi ndriçimi - në njoftime nuk ka shumë. Dhe kush do t'i ruajë llambat e reja nga të njëjtat duar që i morën të vjetrat? Nëse përgjigjja është „askush“, pas disa vitesh sërish do të presim donator.