Në Karposh dy kënde lojërash për fëmijë janë në gjendje të keqe për arsye krejtësisht të ndryshme, por pasoja është e njëjtë: fëmijët duhet të kenë kujdes më shumë se të rriturit që duhej t'i mirëmbanin.

Në Taftalixhe, në këndin inkluziv të lojërave për fëmijë pranë Halk Bankës, para Stacionit të Zjarrfikësve, qytetarët ankohen se rekuizitat janë të lëkundura dhe të rrezikshme për fëmijët që luajnë në to çdo ditë. „Mirë është që vendosen kënde lojërash për fëmijë, por ato duhet të mirëmbahen. Problemi është se kjo nuk bëhet rregullisht“, thonë ata dhe kërkojnë reagim urgjent.

I kujt është këndi i lojërave? Nga Komuna e Karposhit përgjigjen se këndin e ka vendosur Qyteti i Shkupit, prandaj mirëmbajtja dhe rikonstruimi janë obligim i tij. Komuna, thonë, i ka dërguar Qytetit shkresë urgjente dhe pret që „shërbimet kompetente të dalin në terren shpejt“. Për momentin, rrëshqitëset në Taftalixhe qëndrojnë aty ku kanë qëndruar - të lëkundura.

Në Karposh 1, nga ana tjetër, problemi nuk është te mirëmbajtja, por te vandalët. Komuna njoftoi se në këndin e lojërave atje janë dëmtuar disa rekuizita dhe një pjesë e pajisjeve urbane, dhe i kërkoi policisë t'i gjejë kryerësit sa më shpejt. „Për fat të keq, investimet në krijimin e hapësirave të sigurta dhe të rregullta për më të vegjlit sërish vihen në pikëpyetje për shkak të sjelljes së papërgjegjshme dhe rasteve vandale“, thanë nga Komuna.

Karposhi thotë se në territorin e tij ka 57 kënde lojërash për fëmijë, të cilat i mirëmban rregullisht dhe i rikonstrukton sipas nevojës, dhe u bën thirrje qytetarëve të sillen me përgjegjësi ndaj hapësirës publike. Thirrja është në vend - një kënd lojërash i shkatërruar është vjedhje nga fëmijët e vet. Por prindi në Taftalixhe nuk pyet cili nivel i pushtetit e vendosi rrëshqitësen. Pyet kush do ta shtrëngojë para se të bjerë ndonjë fëmijë prej saj.