Deti i Azovit, ai vazhdim i cekët i Detit të Zi që me shekuj ishte oborri i pasmë rus, këtë javë u bë vend ku Rusia nuk komandon më. Dronët ukrainas i sulmuan anijet ruse deri në atë shkallë sa Moska u detyrua ta ndalojë trafikun nëpër det - një goditje që dobëson logjistikën ruse, izolon Krimenë dhe kërcënon eksportin e mallrave kyçe.

Komandanti i forcave ukrainase të dronëve, Robert Brovdi, njoftoi se për vetëm nëntë ditë u goditën 116 anije ruse në Detin e Azovit. Përgjigjja e Rusisë ishte t'i mbyllë dy kalimet më të rëndësishme - kanalin Don-Azov dhe Ngushticën e Kerçit. Imazhet satelitore tregojnë kolona të gjata anijesh që presin, të ngecura, pa dalje.

Nga bllokada ushtarake në atë ekonomike

Ukraina gjithnjë e më shpesh godet tankerët e „flotës hije“ ruse që transportojnë karburant nën sanksione. Por bllokada e Azovit godet shumë më gjerë - nën goditje janë edhe eksporti i grurit dhe i vajit të lulediellit. Instituti për Studimin e Luftës i përshkroi goditjet si një „fazë të re“ që e pret Krimenë e okupuar dhe i ndërpret rrugët detare ruse për derivatet e naftës dhe grurin. Komandanti Jevgen Karas ishte i drejtpërdrejtë: prerja e gjithë logjistikës u bë „problem që rusët nuk mund ta zgjidhin“, ndërsa presioni, thotë ai, sapo do të forcohet.

Këtu tregimi pushon së qeni vetëm ruso-ukrainas. Rusia siguron rreth një të pestën e eksportit botëror të grurit, dhe rreth 25 për qind e kësaj kalon pikërisht nëpër Detin e Azovit. Analisti bujqësor Andrej Sizov paralajmëron se ndërprerja më e gjatë mund t'i kushtojë Rusisë miliarda. Kontratat e së ardhmes për grurin tashmë u ngritën për shkak të krizës. E kur ngriten çmimet e grurit në bursat botërore, fatura në fund arrin edhe te furra e lagjes - edhe tek ne.

Moska, sigurisht, e quan këtë terrorizëm. Kreu i diplomacisë ruse Sergej Lavrov deklaroi se „edhe piratët e mbajnë plaçkën“, duke i akuzuar ukrainasit se veprojnë sipas parimit „as për ne, as për të tjerët“ - vetëm për të shkaktuar dëm dhe frikë. Ukraina pohon se godet vetëm objektiva ushtarake.

Ironia është e rëndë. Deti i Azovit ishte një lidhje vitale që lidhte Rusinë jugore me tregjet botërore përmes Detit të Zi. Pas shpërbërjes së BRSS-së, Moska dhe Kievi më 2003 u dakorduan për të drejtën e përbashkët të lundrimit - marrëveshje që Rusia e shkeli sapo aneksoi Krimenë më 2014. Njëzet e dy vjet më vonë, po ai det i kthehet Rusisë si bumerang. Kush tha se gjeopolitika s'ka kujtesë?