Emiratet e Bashkuara Arabe do të investojnë edhe 40 miliardë euro në Gjermani. Shifra u publikua nga të dyja palët gjatë vizitës shtetërore të presidentit emirat Mohamed bin Zajed al Nahjan në Berlin - dhe ajo më se dyfishon investimet e deritanishme të shtetit të Gjirit në ekonominë gjermane, të cilat arrinin 34 miliardë euro.

Përveç kësaj u nënshkruan edhe 29 kontrata mes kompanive gjermane dhe emirate, me vlerë gati 9,4 miliardë euro. Berlini dhe Dubai themelojnë Këshillin Gjermano-Emirat të Investimeve për nxitjen e investimeve dhe forcimin e dialogut mes sektorit publik dhe privat.

Ku shkojnë paratë

Një pjesë e investimeve është e destinuar për infrastrukturë të avancuar dixhitale - mes tjerash për zhvillimin e qendrave të reja, më bashkëkohore të të dhënave me kapacitet prej afërsisht një gigavati. Kjo nuk është punë e vogël: një gigavat është përmasa e një centrali serioz, ndërsa flasim për konsum serverash.

Presidenti emirat u prit me nderime të plota ushtarake nga presidenti gjerman Frank-Valter Shtajnmajer, e pastaj u takua edhe me kancelarin Fridrih Merc. EBA janë partneri më i rëndësishëm tregtar gjerman në Gji. Vitin e kaluar tregtia dypalëshe arriti pak mbi 13 miliardë euro - Gjermania eksportoi mall në EBA për rreth 11 miliardë, ndërsa nga Emiratet importoi për rreth dy miliardë.

Çfarë thotë në fakt ai raport

Njëmbëdhjetë miliardë eksport përballë dy miliardë importi. Ky është raport pesë me një në favor të Gjermanisë. E megjithatë, ajo palë që importon pesë herë më shumë sesa shet është ajo që tani hyn me 40 miliardë kapital të vetin. Shtetet e Gjirit me vite i investojnë të ardhurat nga nafta në ekonomi, infrastrukturë dhe teknologji të huaja - dhe kjo nuk është bamirësi, por pozicionim për periudhën kur nafta nuk do të jetë më aduti kryesor.

Gjermania, nga ana e saj, hyn në këtë nga një pozitë që dhjetë vjet më parë nuk e kishte. Baza industriale që me dekada ishte themeli i fuqisë së saj përballet me energji të shtrenjtë dhe me konkurrencë globale që nuk pret. Kur një ekonomi e tillë i pranon paratë e mëdha nga Gjiri me nderime ushtarake në aeroport, kjo thotë diçka edhe për vetë atë.

Në Ballkan vizita të tilla i njohim. Dallimi është se te ne investimet e Gjirit më së shpeshti reduktohen në një memorandum të njoftuar, një skicë të ndonjë kompleksi dhe një fotografi shtrëngimi duarsh. Gjermania nënshkroi 29 kontrata me shuma konkrete. A do të dukej njësoj te ne?