E pyet inteligjencën artificiale çfarë të hash, ajo të jep një plan për katër sekonda, plani duket profesional dhe muajin e ardhshëm e ndjek. Askush nuk të tha se përgjigjja ishte bindëse, e jo e saktë. Ky është dallimi që nutricionistët tani nisën ta shpjegojnë me zë të lartë.

Nutricionisti spanjoll Aitor Sançez e formulon problemin me një fjali: inteligjenca artificiale mund të japë një përgjigje bindëse që nuk është domosdoshmërisht më e përshtatshmja. Ai shton diçka edhe më konkrete - këto sisteme kanë prirje të lajkatojnë dhe të gjejnë një kënd pozitiv edhe kur rekomandimi nuk ka mbështetje shkencore. Pastaj gabon dhe kthehet prapa.

Ajo „kthehet prapa“ është detaji kyç. Kur gabimi është te algoritmi, ai thjesht e korrigjon te pyetja e radhës. Kur gabimi është në ushqimin tënd tre muaj, prapa nuk kthehet askush.

Çfarë inteligjenca artificiale nuk di për ty. Nuk e di historinë tënde mjekësore. Nuk i sheh analizat e gjakut. Nuk e di çfarë lidhjeje ke me ushqimin, a ke pas vetes dieta restriktive, sa stres mbart dhe a mund të mbahet fare plani që të jep më shumë se dy javë. Alergjitë dhe intolerancat shpesh nuk hyjnë fare në llogari, ndërsa informacionet mund të jenë të vjetruara ose thjesht të pasakta.

Trajnerja e ushqyerjes Klau Gago e tërheq vijën në një vend të zgjuar: mjeti është i dobishëm për të renditur idetë dhe për të shpjeguar ndonjë term. Problemi fillon në momentin kur ajo përgjigje e shpejtë fillon të zëvendësojë kujdesin shëndetësor të personalizuar.

Këshilli i Përgjithshëm spanjoll i dietologëve-nutricionistëve shkon edhe më larg dhe thotë se planet ushqimore të gjeneruara nga inteligjenca artificiale përbëjnë mashtrim profesional, se një udhëheqje e tillë nuk është as e saktë as e sigurt kur bëhet fjalë për shëndetin, dhe se fusha kërkon rregullim.

Te ne pyetja është më e thjeshtë, sepse radha është më e shkurtër. Para se të kishte çat-bot, planin ushqimor e sillte komshiu, tezja ose grupi në fejsbuk. Tani e sjell një ekran që shkruan më mirë se të gjithë ata dhe tingëllon më i sigurt se çdo mjek. A do të thotë kjo se është i saktë, apo vetëm se është më bindës?