Shkupi kërkoi dëshmitar, Sofja u përgjigj me rregullore. Ministri i Punëve të Jashtme, Timço Mucunski, deklaroi se Maqedonia dëshiron që Bashkimi Evropian të jetë i pranishëm në çdo bisedë të ardhshme me Bullgarinë - përmes institucioneve ose përmes shteteve anëtare - sepse besimi mes dy palëve, sipas tij, për momentin mungon.

Ministria e Punëve të Jashtme e Bullgarisë nuk e përplasi derën. Por as nuk e hapi më gjerë. Përgjigjja thotë se anëtarësimi i Maqedonisë është çështje evropiane, që zgjidhet në kuadër të institucioneve evropiane dhe sipas rregullave e procedurave tashmë të përcaktuara. Bullgaria, thonë, e mbështet punën e Komisionit Evropian, ndërsa rezultatet vlerësohen në Këshillin Evropian.

Pastaj vjen fjalia që Shkupi e dëgjon me vite: „Bullgaria gjithmonë ka qenë dhe mbetet e hapur për dialog konstruktiv me Republikën e Maqedonisë së Veriut“. Dhe menjëherë pas saj, kushti: „Presim që edhe Republika e Maqedonisë së Veriut t'i përmbushë detyrimet e saj dhe t'i nisë ndryshimet e nevojshme me qëllim që të përparojë në rrugën e saj evropiane“. Sofja shton se marrëdhëniet e mira fqinjësore janë kusht për përparim dhe se kandidatë të tjerë shënojnë përparim të konsiderueshëm pavarësisht mjedisit të ndërlikuar të sigurisë.

E përkthyer nga diplomatikja: BE-ja mund të ulet në tryezë, por menyja është shtypur tashmë. Sofja vazhdon të thirret në konsensusin evropian të korrikut 2022, ndërsa pika kyçe mbetet futja e bullgarëve në Kushtetutë. Qeveria në Shkup nuk e kontestion vetë futjen kushtetuese, por kërkon garanci se pas saj nuk do të shfaqen kushte të reja bilaterale në fazat e ardhshme të negociatave.

Mucunski ndërkohë theksoi se në ngjarjen ku mori pjesë nuk pati takime zyrtare pune me përfaqësues bullgarë, përveç një takimi të shkurtër me kolegen bullgare. Nga Brukseli, ndërkaq, në fund të shtatorit ose në fillim të tetorit pritet një dokument për qasjen e ardhshme ndaj zgjerimit, në prag të vizitës së paralajmëruar të Ursula von der Leyen në Ballkanin Perëndimor.

Katër vjet pas konsensusit, dy palët pajtohen për një gjë - se nuk i besojnë njëra-tjetrës. A do ta ndryshojë këtë prania e Brukselit në dhomë, apo thjesht do të fitojmë edhe një dëshmitar të së njëjtës bisedë që sillet në rreth?