„Maqedonisë i nevojitet opozitë e fortë“, tha kryeministri Hristijan Mickoski në një intervistë televizive nga Nju Jorku. Menjëherë pas kësaj shpjegoi, parti pas partie, pse një opozitë e tillë, sipas tij, për momentin nuk ekziston.

Platforma 12:05

E para në radhë ishte „Bisedat për të ardhmen në 12:05“, grupi brenda LSDM-së që angazhohet për ndërrimin e liderit Venko Filipçe. Mickoski i qortoi se pretendojnë që qytetarët votuan për VMRO-DPMNE-në sepse nuk kishin zgjedhje tjetër. „Më vjen keq që edhe kjo alternativë, që paraqitet si alternativë e opozitës, sërish e nënvlerëson popullin dhe e fyen duke e bërë dritëshkurtër“, tha ai. Dhe përfundoi: „Edhe në jetë, edhe në politikë, nuk keni shans të dytë për përshtypjen e parë.“

Mickoski në fakt po i përgjigjej një pyetjeje gazetareske për pretendimin e Filipçes se anëtarët e platformës paguhen nga pushteti dhe punojnë për kryeministrin. Për këtë pjesë përgjigjja ishte se bëhet fjalë për „punë të brendshme“ të LSDM-së, në të cilat ai nuk dëshiron të përzihet.

BDI, Levica dhe „skandalet“

Për koalicionin opozitar të udhëhequr nga BDI-ja tha se janë „struktura të vjetra, të konsumuara“, performancën e të cilave e njohim për më shumë se 20 vjet. Për Levicën, se në dy institucionet në Qytetin e Shkupit ku pati mundësi të tregojë diçka, la „përshtypje të zbehtë ose asnjë përshtypje“, dhe se aty ka një grup prej „dhjetë, 15, 20 njerëzish“ të kënaqur me financimin vjetor, të cilët „tri-katër herë shkojnë në det te fqinji ynë jugor“. Për udhëheqjen e LSDM-së tha se çdo ditë „sajon histori“ dhe i brendon si skandale „të mëdha, të vogla, të mesme“.

Kryeministri si analist i opozitës

Interesante sa shumë kohë u kushton kryeministri partive që, sipas fjalëve të tij, nuk janë mjaft serioze për të qenë alternativë. Kur pushteti i shpërndan nota opozitës dhe i thotë si duhet të jetë, ia vlen të pyetet: a është opozita e fortë që e dëshiron Mickoski ajo që do ta kritikojë pushtetin, apo ajo që do t'i pëlqejë kryeministrit?

Opozita e fortë, sipas definicionit, nuk pret notë nga kryeministri.