Gjykata e Lartë e Delhit në Indi më 22 maj nxori një vendim që mund të ndryshojë mënyrën se si Google u shet fjalë kyçe reklamuesve në mbarë botën. Gjyqtarja Mini Pushkarna, në një dokument 163-faqësh, e shpalli Google fajtor për shkelje të markave tregtare përmes platformës AdWords, dhe i caktoi paditësit - prodhuesit sanitar Hindware - 3 milionë rupi (rreth 31.600 dollarë) si dëmshpërblim simbolik.

Vendimi e refuzoi mbrojtjen e Google se është „ndërmjetës pasiv" - se thjesht vendos reklamat. Jo. Gjyqtarja konstaton se shitja e markës tregtare të paditësit si fjalë kyçe pa lejen e tij përbën akt shkeljeje. Përkthim: Google merr para nga konkurrentët për t'u shfaqur reklamat e tyre te njerëzit që kërkojnë markën tënde. Dhe tani, kjo është e paligjshme - në Indi.

Reagimi erdhi shpejt. Nithin Kamath, themelues i platformës broker Zerodha, shkroi në X se kompania e tij po lufton me këtë problem më shumë se një dekadë. „Kur dikush kërkon 'Zerodha', trafiku duhet të vijë te Zerodha. Por gjëja e parë që shfaqet janë reklamat që e çojnë përdoruesin në faqe konkurrente." Të njëjtën gjë e konfirmoi edhe Sridhar Vembu, themelues i Zoho. Ky model - „paguaj ose marka jote do t'i shitet dikujt tjetër" - është thelbi i biznesit të Google Search-reklamave, dhe industria nuk ka alternativë.

Google i përgjigjet kësaj me politikën zyrtare. „Nuk lejojmë konkurrentët të përdorin terma të mbrojtur në tekstin e reklamave." Tekstin e reklamave - por jo fjalët kyçe që i aktivizojnë. Ky është dallimi thelbësor që gjykata indiane po e rrethon. Korporata premtoi se do të punojë me autoritetet lokale kur dispozitat dalin „shumë të gjera ose të papajtueshme".

Ekspertët juridikë, megjithatë, e ulën entuziazmin. Aparajita Rana nga AZB & Partners thotë se vendimi nuk ka „ndikim të gjerë" - gjykatat indiane tashmë kanë vendosur se platformat e internetit mund ta humbasin mbrojtjen ligjore kur marrin pjesë aktivisht në veprimtari të paligjshme. Por shton diçka të rëndësishme: ky rast e përcakton se vetë procesi i ofrimit të termave të mbrojtur reklamuesve, edhe kur është i automatizuar, mund të konsiderohet „pjesëmarrje aktive". Ky është një përkufizim që do të trokasë në derën e të gjitha platformave të mëdha.

Konteksti: India ka më shumë përdorues të internetit se çdo vend tjetër përveç Kinës. Çdo vendim rregullator këtu pasqyrohet kudo ku bizneset lokale vuajnë nga i njëjti model. Për rregullatorët evropianë - që tashmë e ndjekin Google me hetime antimonopol - ky vendim është precedent i frytshëm. Për bizneset e vogla ballkanike, që çdo vit i paguajnë Google për të riblerë markën e tyre përmes reklamave, ky është sinjali i parë real se ajo praktikë më në fund po vihet nën pyetje.