Кичево и од 21-виот министер доби ветување за нова болница, а градбата почна во осумдесеттите

Новата болница во Кичево почна да се гради во осумдесеттите години на минатиот век. Првиот министер за здравство дојде да ја види во 1998 година, 13 години по почетокот на градбата. Оттогаш низ Кичево поминаа 21 министер со ветување. Последниот е Сашо Клековски.

За разлика од претходниците, Клековски барем не вети датум. „За првпат работиме со конкретно финансирање, не сме во фаза на ветувања, туку сме во фаза на физибилити и проектирање“, рече министерот. Според него, постои пакет од 195 милиони за завршување на Клиниката во Штип, за реконструкција и нов објект на Клиниката во Тетово и за нов објект на Општата болница во Кичево. „Средствата ги имаме“, вели тој.

Но реченицата што најмногу кажува е друга: се прават студии дали може да се продолжи со постојниот објект или ќе се бара нова локација. По речиси четири децении, државата сè уште не знае дали бетонот што го плаќаше вреди нешто. Градбата заглави на ниво на карабина, а старата конструкција, според извештаите, е застарена и не ги исполнува современите стандарди за медицински установи. Голем дел од потрошените милиони, значи, се покажаа како фрлени пари.

Апарати има, лекари нема доволно

Додека се чекаат студиите, министерот вели дека „не чекаат“ – болницата ја зајакнуваат уште сега. Директорката Маја Цветаноска Трајковска набројува нов дигитален рендген, дигитален мамограф и 3D ехо-апарат, донација од Општината. Од министерството велат дека трајно се вработени 4 специјализанти и 4 доктори по општа медицина, а постапката за уште 5 специјализанти е во завршна фаза.

„Опрема без кадар не значи ништо, а кадар без опрема не може да работи“, вели Клековски. Точно. Болницата работи во лоши услови и со недостиг на кадар во повеќе одделенија, а лекарите и сестрите што останале во застарениот објект работат преку своите граници. Ако утре се изгради нова зграда – кој ќе работи во неа? Без услови што ќе задржат млад лекар во Кичево, новите апарати ќе бидат само поскап инвентар.

Градоначалникот Александар Јовановски вели дека Кичевчани заслужуваат нова болница и дека Општината ќе продолжи да помага. Кичевчани слушнаа доволно ветувања за цел живот. Следниот министер што ќе дојде во Кичево нека донесе градежна дозвола, не изјава.