Filmimi zgjat disa sekonda dhe nuk kërkon shpjegim: njerëz zhysin koka lakre në një tretësirë, pastaj i ngarkojnë në kamionë. Një bloger ekologjik e publikoi javën e kaluar, ndërsa autoritetet në provincën verilindore Hebei konfirmuan se është autentik. Tretësira, sipas raportimit, përmbante formaldehid - kimikat që në Kinë është rreptësisht i ndaluar për konservimin e ushqimit dhe që renditet si kancerogjen i mundshëm.

Policia ka marrë masa ndaj të përfshirëve, njoftuan mediat shtetërore. Pushteti lokal në rrethin Kangbao lëshoi një fjali që është gati universale për situata të tilla: „Masa të rrepta ligjore do të merren kundër të gjitha aktiviteteve ilegale ose të papërputhshme për të siguruar sigurinë e furnizimit me perime.“ Paralelisht kryhen inspektime të jashtëzakonshme në tërë vendin, ndërsa hetimi duhet të përcaktojë sa e përhapur është praktika dhe t'i tërheqë sasitë e kontaminuara.

Problemi nuk ndalet në kufi

Ky nuk është lajm lokal. Kina prodhon mbi 30 milionë tonë lakër në vit - rreth gjysmën e prodhimit botëror - dhe eksporton sasi të konsiderueshme në vendet fqinje aziatike, mes të cilave Vietnamin, Korenë e Jugut dhe Rusinë. Tregu Sinfadi në Pekin njoftoi se e kontrolloi prejardhjen e lakrës së vet dhe se tek ai nuk kanë arritur sasi të kontaminuara.

Vëreni strukturën e reagimit: së pari filmimi i një blogeri, pastaj konfirmimi i autoriteteve, pastaj përpjekja për të parandaluar panikun. Institucionet nuk e zbuluan problemin - e zbuluan pasi dikush e filmoi. Kjo është skemë që nuk është specialitet kinez.

Pyetja që mbetet për lexuesin këtu është më konkrete. Perimet e importuara kalojnë nëpër inspektim - Agjencia për ushqim dhe veterinari është ajo që merr mostra dhe që publikon rezultatet. Sa mostra janë marrë këtë vit, për çfarë janë testuar dhe ku janë publikuar gjetjet? Kjo është e dhënë që nuk kërkon bloger me telefon celular për të dalë në dritë, por vetëm një institucion që e bën punën për të cilën është themeluar.