„Parizianë, shkoni në shtëpi“ - shkruhet nëpër muret në Plogof. Nëpër automjetet me targa parisiane janë gërvishtur mesazhe, ndërsa në Plobanek-Leskoni në një automjet qëndron e gërvishtur edhe „kthim të mbarë, parizianë“. Në Bretanjë vera këtë vit mban erë diçka që nuk është as kripë as jod.

Më e ashpra është në departamentin e Finisterit, ku numri i banorëve në verë rritet tri herë. Vitin e kaluar, mes prillit dhe shtatorit, atje u regjistruan 7,4 milionë netë qëndrimi. Ndërsa këtë vit vala e të nxehtit në jug të Francës dërgoi edhe një valë turistësh drejt veriut, drejt brigjeve më të freskëta të Bretanjës dhe Normandisë. Pushime të zgjedhura për shkak të temperaturës, jo për shkak të detit.

Kryetari i Plobanek-Leskonit, Loik le Fir, i dënoi gërvishtjet: „Qyteti ynë gjithmonë ka qenë dhe duhet të mbetet bashkësi e hapur dhe mikpritëse.“ Kolegu i tij nga Penmarku, David le Ber, tha diçka më urgjente se dënimi - se numri i banorëve hidhet nga 5.600 në 17.000, ndërsa rrugët, parkingjet dhe banesat mbeten të njëjtat. Në të njëjtin vend, një çiklist ndaloi një grua që vraponte për ta pyetur nëse ishte vendase.

Kur shifra të tejkalon

Francezët përbëjnë 80 për qind të netëve të qëndrimit në Bretanjë, ndërsa 30 për qind vijnë nga rajoni i Parisit. Pra ky nuk është rebelim kundër të huajve - është rebelim kundër bashkatdhetarëve të vet, çka e bën pamjen shumë më interesante. Nuk është çështje gjuhe apo kombësie, por aritmetike: infrastruktura e ndërtuar për 5.600 njerëz nuk mban 17.000, pavarësisht cilin pasaportë mbajnë.

Prej andej deri te Ohri, Struga apo Krusheva nuk ka shumë largësi. Edhe atje numri i njerëzve në gusht është shumëfish më i madh se numri që ujësjellësi, parkingjet dhe grumbullimi i mbeturinave mund të përballojnë. Dallimi është se në Bretanjë kryetarët së paku e pranojnë me zë të lartë problemin me infrastrukturën, në vend që të numërojnë vetëm vizitueshmërinë.

Gërvishtja e automjetit është vandalizëm dhe aty nuk ka debat. Por ajo që qëndron nën të është pyetje tjetër: çfarë bën një komunë kur popullsia i trefishohet tre muaj në vit, ndërsa buxheti, shërbimet dhe vendimet janë bërë për nëntë të tjerët?