Kur edhe policia fillon të ketë frikë nga kamerat e veta, ia vlen t'i kushtohet vëmendje. Policia e Los Anxhelosit - e treta për nga madhësia në SHBA - e la kontratën e saj trevjeçare me kompaninë Flock Safety të skadonte, duke iu referuar hapur shqetësimeve serioze për liritë qytetare dhe privatësinë.

„Kjo kontratë nuk po rinovohet për shkak të shqetësimeve serioze rreth lirive dhe të drejtave qytetare, veçanërisht rreth privatësisë dhe të dhënave që mblidhen nga këto kamera", deklaroi Din Gijalamas, zyrtar i lartë për informim në polici. Para se të mendojnë për rinovimin, thotë ai, së pari duhet të zgjidhen çështjet e të dhënave, privatësisë, sigurisë dhe ndarjes së tyre.

Çfarë bën Flock? Kompania menaxhon një rrjet prej rreth 80.000 kamerash në të gjithë SHBA-në që lexojnë targat e automjeteve dhe mundësojnë ndjekjen automatike të çdo makine që kalon pranë tyre. Praktikisht, një sistem që di ku keni qenë, kur dhe sa shpesh - pa ju pyetur askush për leje.

Los Anxhelosi nuk është i vetëm. Edhe qytete të tjera, si Mauntin Vju në Kaliforni dhe Saut Portland në Mejn, i ndërprenë lidhjet me kompaninë për të njëjtat arsye. Lista e problemeve rreth Flock-ut është e gjatë: raste të dokumentuara arrestimesh të gabuara për shkak të përputhjeve të rreme, shkelje sigurie që zbuluan pamje të drejtpërdrejta nga kamerat, madje edhe agjentë federalë që pa autorizim hynin në sistemet policore për të ndjekur imigrantët.

Historia ia vlen të shihet edhe nga një ulëse ballkanike. Ndërsa atje, në një vend që e mbajmë për themel të privatësisë dhe të drejtave, policia tërhiqet nga survejimi masiv, te ne kamerat dhe sistemet e ndjekjes ndërtohen në heshtje kudo - dhe rrallë kush pyet se kush i sheh pamjet, ku ruhen dhe sa gjatë. Nëse policia më e madhe në Amerikë arriti në përfundimin se 80.000 kamera janë tepër, çfarë tregon kjo për heshtjen tonë të rehatshme?