Lufta në Ukrainë prej kohësh nuk zhvillohet vetëm në front. Një skenë nga Lvivi, një qytet larg vijave të para, tregoi luftën tjetër, më të fshehtë - atë mes shtetit dhe qytetarëve të vet. Më 8 korrik, në lagjen Sihiv, një grup njerëzish përmbysën një automjet të qendrës ushtarake të rekrutimit pasi zyrtarët ndaluan një burrë të lindur në vitin 1996 për të kontrolluar dokumentet ushtarake.

Sipas qendrës së rekrutimit (TCK), burri gjoja i kishte shkelur rregullat për evidencën ushtarake dhe fshihej nga shërbimi që nga 12 qershori. Por atë që autoritetet e quajnë „kontroll dokumentesh", dëshmitarët e përshkruajnë krejt ndryshe. „E rrahën, e futën me forcë në një kombi dhe u larguan. Njerëzit u ngritën. Askush nuk ka të drejtë të rrëmbejë një fëmijë dhe ta hedhë në kombi", tregoi një grua nga vendngjarja.

Shefi ushtarak rajonal Maksim Kozicki premtoi një hetim zyrtar për ligjshmërinë e veprimit të personelit të rekrutimit, ndërsa policia pretendon se vetëm siguroi rendin publik. Por vetë fakti që qytetarë të thjeshtë guxojnë të përmbysin një automjet shtetëror flet për diçka më të thellë se një incident i vetëm - për besimin e çarë mes njerëzve dhe mënyrës si zhvillohet mobilizimi.

Kjo është pjesa e luftës që rrallë arrin faqet e para. Ndërsa bota shikon raketa dhe fronte, në qytetet prapa vijës zhvillohet një dramë e heshtur: familje që fshehin djemtë, kombi që rrëmbejnë burra nga rruga, fqinjë që dalin t'i mbrojnë. Çdo luftë e gjatë në fund fillon të hajë edhe shtetin e vet nga brenda. Për një rajon që i mban mend mobilizimet e veta dhe ikjet e veta nga uniforma, kjo pamje nuk është as e largët e as e panjohur.