OpenAI po mbyll Atlas - shfletuesin me inteligjencë artificiale që e nisi vetëm në tetor, me ChatGPT në thelbin e tij. Por kompania nuk heq dorë nga ideja se IA duhet të të ndihmojë ndërsa lundron; përkundrazi, i merr funksionet që i testoi në Atlas dhe i zhvendos aty ku njerëzit tashmë punojnë - në aplikacionin desktop të ChatGPT dhe në një shtesë për Google Chrome.

Mbyllja vjen disa muaj pasi drejtoresha ekzekutive për aplikacione Fixhi Simo i porositi ekipit të ulë „aventurat anësore" - një direktivë që më parë vrau edhe mjetin për gjenerim videosh Sora. Me fjalë të tjera, OpenAI zbuloi se shfletuesi është funksion, jo destinacion. Prandaj në vend që të ndërtojë një shtëpi të re, po zhvendoset në atë të tjetrit - dhe pikërisht në Chrome, shtëpinë e rivalit më të madh.

Vitin e kaluar e gjithë industria e IA-së luftoi për ta rrëzuar Chrome nga froni si vendi ku njerëzit kalojnë më shumë kohë në internet. Perplexity nxori Comet, The Browser Company nxori Dia, ndërsa Google dhe Microsoft e plotësuan Chrome dhe Edge me funksionet e tyre të IA-së. Pas disa muajsh eksperimentimi, OpenAI duket se arriti në përfundimin se ajo luftë nuk ia vlen - më mirë të futesh në zakonet e përdoruesit sesa ta detyrosh të ndryshojë zakon.

Shtesa e re për Chrome i jep ChatGPT qasje te përmbajtja e faqes që po sheh - mund të bësh pyetje, të marrësh një përmbledhje ose të nisësh një detyrë më të gjatë, drejtpërdrejt nga shfletuesi. Ky është rival i drejtpërdrejtë i Gemini Side Panel të Google, që bën gjëra të ngjashme. Paralelisht, aplikacioni desktop merr një shfletues të integruar më të fuqishëm ku mund të hapësh faqe, të kyçesh dhe të shkarkosh skedarë pa dalë nga ChatGPT, ndërsa një shfletues i veçantë në re punon në serverët e OpenAI për detyra që agjenti i përfundon në vend të teje. Rezultati: ChatGPT do të jetë një vend pune i vazhdueshëm që shtrihet nëpër Chrome, desktopin dhe agjentin e IA-së - dhe sërish, rruga deri aty kalon nëpër shtëpinë e Google.