OpenAI го гасне Atlas – прелистувачот со вештачка интелигенција што го пушти дури во октомври, со ChatGPT во својата срцевина. Но компанијата не се откажува од идејата дека ВИ треба да ти помага додека сурфаш; наместо тоа, ги зема функциите што ги тестираше во Atlas и ги префрла таму каде луѓето веќе работат – во десктоп апликацијата на ChatGPT и во едно проширување за Google Chrome.

Гаснењето доаѓа неколку месеци откако извршната директорка за апликации Фиџи Симо му порача на тимот да ги намали „споредните авантури” – директива што претходно го уби и алатката за генерирање видео Sora. Со други зборови, OpenAI откри дека прелистувачот е функција, не одредиште. Затоа наместо да гради нов дом, се вселува во туѓиот – и тоа буквално во Chrome, куќата на најголемиот ривал.

Изминатата година целата ВИ-индустрија војуваше за да го собори Chrome од тронот како место каде луѓето го поминуваат најмногу време на интернет. Perplexity го пушти Comet, The Browser Company пушти Dia, а Google и Microsoft ги дополнија Chrome и Edge со свои ВИ-функции. По неколку месеци експериментирање, OpenAI изгледа заклучи дека таа војна не вреди – подобро е да се вгнездиш во навиките на корисникот отколку да го тераш да менува навика.

Новото проширување за Chrome му дава на ChatGPT пристап до содржината на страницата што ја гледаш – можеш да поставуваш прашања, да добиеш резиме или да започнеш подолга задача, директно од прелистувачот. Тоа е директен ривал на Gemini Side Panel од Google, кој прави слични работи. Паралелно, десктоп апликацијата добива посилен вграден прелистувач каде можеш да отвораш сајтови, да се најавуваш и да симнуваш датотеки без да излезеш од ChatGPT, а посебен облачен прелистувач работи на серверите на OpenAI за задачи што агентот ги завршува наместо тебе. Резултатот: ChatGPT сака да биде постојано работно место што се протега низ Chrome, десктопот и ВИ-агентот – и повторно, патот до тоа минува низ куќата на Google.