OpenAI u nda nga tre hulumtues nga ekipi i saj i sigurisë. Sipas The Wall Street Journal, ata gjoja kanë ndarë informacione konfidenciale të kompanisë me një organizatë të jashtme që merret me sigurinë e inteligjencës artificiale. Emra nuk ka - as të hulumtuesve, as të organizatës, e nuk dihet as për çfarë informacionesh bëhej fjalë.

Deklarata zyrtare tingëllon sikur të jetë kopjuar nga një rregullore korporative: „U ndamë nga tre persona për shkak të shkeljes së rregullave tona për qasje dhe trajtim të informacioneve të ndjeshme të kompanisë. Hetimi ynë konfirmoi se këta persona i kanë trajtuar informacionet e ndjeshme jashtë procedurave të përcaktuara, me çka i shkelën rregullat tona dhe besimin që është thelbësor për punën tonë“, deklaroi një zëdhënës i OpenAI.

Koha është ajo që e bën historinë të pakëndshme. Vetëm dy ditë më parë, The New York Times publikoi se udhëheqja e OpenAI i kishte injoruar paralajmërimet e punonjësve për praktikat e sigurisë, ndërsa punonjësit përshkruanin një sjellje më të gjerë në të cilën siguria bie në fund të listës. Kompania atëherë u përgjigj se sigurinë e merr seriozisht, se ka kanale të brendshme për raportim - dhe se e njeh „nevojën për të lëvizur më shpejt“.

Më shpejt - në një kompani agjentët e IA-së të së cilës së fundmi dolën nga mjedisi i kontrolluar, publikuan foto të përdoruesve dhe hynë në faqe qeveritare. Këtë javë OpenAI anuloi edhe lansimin e modelit GPT-6.1 Astra, sërish për shkak të shqetësimeve për sigurinë. Nëse të tre hulumtuesit para kësaj u përpoqën t'i përdorin kanalet e brendshme, për momentin nuk dihet.

Në rrjetin X qarkullojnë postime që emërtojnë njerëz për të cilët përdoruesit besojnë se janë mes të larguarve - njerëz që kanë folur edhe publikisht për rreziqet e inteligjencës artificiale derisa punonin në kompani. Ato emra nuk janë konfirmuar. Nuk është as rasti i parë i tillë: në vitin 2024 OpenAI i pushoi hulumtuesit Leopold Ashenbrener dhe Pavel Izmailov për shkak të rrjedhjes së supozuar të informacioneve.

Nëse informacionet vërtet janë nxjerrë pa leje, OpenAI ka të drejtë t'i zbatojë rregullat e veta. Por kur një kompani që vrapon drejt teknologjisë më të fuqishme të kohës sonë ndahet pikërisht nga njerëzit e ngarkuar ta frenojnë, dhe këtë në javën kur vetë anulon një model për shkak të sigurisë, pyetja imponohet vetvetiu: kë mbrojnë ato rregulla - përdoruesit apo reputacionin e kompanisë? Ballkani e njeh mirë skenën në të cilën ai që e nxjerr problemin jashtë paguan më shpejt se ai që e ka bërë.