Pension në 72 vjeç? Vetëm përmendja e një mundësie të tillë mjaftoi për të ndezur një shqetësim serioz mes punëtorëve - dhe për të nxitur një përgjigje të ashpër nga sindikatat.

Temën e hapi ministrja e financave, e cila pohon se ende nuk ka asnjë vendim për ngritjen e kufirit të moshës për pensionim. Por vetëm hedhja e shifrës "72" në opinion mjaftoi. Nga Lidhja e Sindikatave (SSM) reaguan menjëherë: "Nuk mund të zgjidhet deficiti i fondit pensional me zgjatjen e jetës së punës."

Në vend që të punohet deri në pleqëri të thellë, sindikatat kërkojnë të kundërtën - pensione të parakohshme, stazh të beneficuar për zanatet e rënda dhe reforma që do ta stabilizojnë sistemin pa e paguar punëtorët me shëndetin e tyre. Dhe kanë të drejtë në një gjë: deficiti i fondit është problem real, por pyetja është kush do ta mbulojë. Deri tani, sa herë që llogaria nuk dilte, gjëja më e lehtë ishte të hidhej barra mbi kurrizin e atyre që punojnë.

Punëtori ballkanik e njeh mirë këtë lojë. Punohet fizikisht rëndë, jetohet më shkurt, e megjithatë kufiri për pension ngrihet - sikur jetëgjatësia e një minatori a ndërtimtari të ishte e njëjtë me atë të dikujt pas byrosë. A po mendon vërtet shteti t'i lërë njerëzit të punojnë deri në 72 vjeç, apo vetëm po teston sa do të durojë opinioni - kjo do të shihet. Por një gjë është e qartë: një temë e hapur njëherë, mbyllet me vështirësi.