Pikërisht kur dukej se historia për princin Endru po fundosej ngadalë, policia britanike e rihapi. Policia e Tems Valit nisi një hetim të ri të lidhur me akuzat e Virxhinia Xhufres - gruaja pretendimet e së cilës prej vitesh e ndjekin ish-dukën e Jorkut, dhe që ndërroi jetë një vit më parë.

Këtë herë hetimi shkon më tej se letra. Policia planifikon të udhëtojë në SHBA dhe të marrë në pyetje anëtarë të familjes Xhufre - vëllanë dhe kunatin e saj - për të rindërtuar ngjarjet e lidhura me miqësinë e Endrusë me financierin e dënuar Xhefri Epstin. Përveç kësaj, po kërkohen informacione nga institucionet britanike dhe amerikane, ndërsa janë të mundshme edhe marrjet në pyetje të njerëzve të afërt me Endrunë, përfshirë sigurimin e tij.

Endru asnjëherë nuk e ka pranuar fajin. Por reputacioni tashmë është shkatërruar - mbreti Çarls i Tretë ia hoqi titujt mbretërorë dhe e nxori nga rezidenca Rojal Loxh. Pyetja që mbetet varur është nëse institucioni që e mbrojti për dekada tani më në fund po ia dorëzon drejtësisë, apo ky është vetëm një hap tjetër në një lojë të gjatë distancimi.

Ka diçka të njohur në mënyrën si bien të fuqishmit - ngadalë, me shumë tituj të hequr para se të arrihet te e vërteta. A do të përgjigjet vërtet dikush, apo familja e kurorëzuar sërish do ta mbyllë skandalin me mërmëritje derisa bota ta harrojë?