Vendi që i eksporton naftë gjysmës së botës papritur s'ka mjaftueshëm benzinë për vozitësit e vet. Drejtori i Rosneft-it, kompanisë më të madhe ruse të naftës, Igor Seçin, i shkroi një letër Putinit ku dëmin e përshkruan si „të paparë“. E kur shefi i një giganti të naftës panikon në letër, puna ka gjasa të jetë më keq nga ç'thonë televizionet.

Shkaku është fushata ukrainase me dronë që prej muajsh godet rafineritë ruse. Vetëm në maj, 16 sulme me dronë goditën 8 nga 10 uzinat më të mëdha ruse. Analistët vlerësojnë se mbi 25 për qind e kapacitetit të përgjithshëm rus për përpunimin e naftës është nxjerrë nga funksioni. Rezultati shihet te pompat: në Irkutsk, 4.800 kilometra larg Ukrainës, vozitësit presin 18 orë për të mbushur karburant, ndërsa në rajonin e Krasnodarit u mbyll të paktën një e treta e pompave të benzinës.

Seçini kërkon masa drastike - të hiqet shitja e detyrueshme e karburantit përmes bursës, të lejohet benzina më e dobët „Euro-3“, madje edhe importi i karburantit të huaj. Përfytyroni absurdin: Rusia, një nga fuqitë më të mëdha të naftës në botë, importon benzinë nga India dhe ndalon eksportin e së vetës. Putini zyrtarisht e pranoi problemin, por sulmet ukrainase i quajti „jokritike“ - një formulim që tingëllon më shumë si mesazh për publikun sesa si vlerësim i gjendjes.

Ky tregim është më interesant se ç'duket në shikim të parë. Për një kohë të gjatë pamja ishte se lufta zhvillohej vetëm në territorin ukrainas, larg përditshmërisë ruse. Por kur njeriu pret 18 orë për një rezervuar karburanti, lufta pushon së qeni lajm nga fronti dhe bëhet një gropë në ditën e vet. Asnjë fuqi s'është aq e madhe sa të mos e ndiejë luftën në shtëpi - pyetja është vetëm sa gjatë do të zgjasë derisa kjo të bëhet tepër për t'u quajtur „jokritike“.