Një grua 68-vjeçare nga Shkupi më 28 shtator në ora 20 paraqiti në SPB Shkup se rreth orës 15:30, në shtëpinë familjare në lagjen Bit Pazar, ishte sulmuar fizikisht nga motra e saj, N.M. (73). Sipas kallëzimit, motra më e madhe në sulm përdori një send metalik.

Policia thotë se pas dokumentimit të plotë të rastit do të pasojë parashtresa përkatëse. Kaq. Në buletin nuk ka asnjë fjalë për lëndimet, as për atë që i paraprinte.

Rasti i Shkupit nuk është i vetëm në buletinet e policisë nga ditët e fundit. Në Prilep, më 27 shtator në ora 03:20, policia e privoi nga liria A.A. (43), i cili në shtëpinë familjare sulmoi fizikisht bashkëshorten e tij 40-vjeçare. Në Tetovë, SPB ngriti kallëzim penal për „lëndim trupor“ kundër 26-vjeçarit Q.B., i cili sulmoi motrën e tij - më 5 prill. Kallëzimi vjen gati gjashtë muaj më vonë. Në Kumanovë, ndërkaq, policia shoqëroi një djalë 19-vjeçar, sepse në rrugën „Goce Dellçev“ sulmoi fizikisht një të mitur.

Në tre nga katër rastet viktima është anëtar i familjes, ndërsa në dy sulmi ndodhi në shtëpinë familjare - aty ku askush nga jashtë nuk shikon. Buletini i Shkupit përfundon me formulimin „do të pasojë parashtresa përkatëse“. Pyetja është sa nga ato parashtresa arrijnë deri në aktgjykim, dhe nëse dikush në sistem i numëron fare.