39 për qind. Aq është hapja mesatare e 81 njësive të vetëqeverisjes lokale në Maqedoni sipas Indeksit të hapjes për vitin 2026 - një pikë përqindjeje më pak se vjet. Indeksin e përgatitën Fondacioni „Metamorfozis“ dhe Koalicioni Rural, ndërsa rezultatet u prezantuan në një forum tematik në Qendrën Qytetare të Burimeve në Shkup më 25 shtator.

Në krye është Kriva Pallanka me 73 për qind, pas saj Demir Hisari me 68, Koçani me 67 dhe Karposhi me 64 për qind. Të katërta përdorin platformën digjitale mZaednica, përmes së cilës qytetarët raportojnë probleme lokale, komunikojnë me komunën dhe marrin pjesë në anketa dhe konsultime publike.

Qendra për inovacione sociale Blink 42-21, e cila e zhvillon platformën, i paraqet rezultatet si kontekst për punën e saj trevjeçare me komunat. Por indeksi nuk konstaton se aplikacioni është arsyeja për notat më të mira - hapja matet përmes disa praktikave në punën e komunës, jo përmes një mjeti të vetëm digjital. mZaednica aktualisht funksionon në 11 komuna, ndërsa sfida e ardhshme, thonë nga organizata, është që qytetarët të marrin përgjigje të qartë se çfarë ndodhi me raportimet dhe propozimet e tyre.

„Komunë e hapur është komuna në të cilën qytetari informohet me kohë, por mund edhe të pyesë, të marrë pjesë, të ndikojë dhe të kërkojë llogari“, tha drejtoresha e programeve e „Metamorfozis“, Dançe Danillovska-Bajdevska.

Ky është standardi. Realiteti është se komuna mesatare nuk arrin as në gjysmën e tij, e vjet ishte pak më e hapur se sivjet. Kur më e mira është në 73, e mesatarja në 39, pyetja nuk është çfarë aplikacioni na duhet. Pyetja është pse kaq shumë komuna ende e trajtojnë qytetarin si lutës para sporteli, në vend se si dikë të cilit i detyrohen një përgjigje?